ഓൺലൈൻ അഭിമുഖങ്ങൾ ഓട്ടോമേറ്റ് ചെയ്യുന്ന ആദ്യത്തെ എ ഐ ഇൻ്റർവ്യൂവർ വികസിപ്പിച്ചെടുത്ത് ചെന്നൈ ആസ്ഥാനമായുള്ള എ ഐ റിക്രൂട്ട്‌മെൻ്റ് സ്റ്റാർട്ടപ്പായ ഹൈറിംഗ്. എ ഐ ഇന്റർവ്യൂവർ ഉദ്യോഗാർത്ഥികളുടെ പ്രകടനത്തെ അടിസ്ഥാനമാക്കി ചോദ്യങ്ങൾ ചോദിക്കുകയും റെക്കോർഡ് ചെയ്യുകയും വിലയിരുത്തുകയും സ്കോറുകൾ നൽകുകയും ചെയ്ത് ഒരു റിക്രൂട്ടറായി പ്രവർത്തിക്കുന്നു.
‘ഹൈറിംഗ് എഐ സ്‌ക്രീനർ’ എന്ന് വിളിക്കപ്പെടുന്ന എ ഐ മോഡൽ, എച്ച്ആർ റിക്രൂട്ടർമാർ ഓൺലൈൻ ഇൻ്റർവ്യൂകളിൽ പങ്കെടുക്കുന്നതിന്റെ അതേ മോഡലിലാണ് പ്രവർത്തിക്കുന്നത്. അടുത്ത റൗണ്ട് റിക്രൂട്ട്‌മെൻ്റിലേക്ക് കടന്നുപോകാൻ ഏറ്റവും മികച്ച നാലോ അഞ്ചോ ഉദ്യോഗാർത്ഥികളെ ശുപാർശ ചെയ്യാൻ ഈ എഐയ്ക്ക് കഴിയും. ഉദ്യോഗാർഥികൾ കബളിപ്പിക്കുന്നുണ്ടെങ്കിൽ അത് കണ്ടെത്താനും ഇവയ്ക്ക് കഴിയും.
ഹൈറിംഗിലെ സ്ഥാപകനും സിഇഒയുമായ ആദിത്യൻ ആർകെ വിശദീകരിച്ചു, “നിലവിലുള്ള സോഫ്‌റ്റ്‌വെയർ ഒരു ഉദ്യോഗാർത്ഥിയെ അഭിമുഖം ചെയ്യുകയോ ലൈവ് വീഡിയോ അഭിമുഖത്തിൽ അവരുടെ പ്രകടനം വിലയിരുത്തുകയോ ചെയ്യുന്നില്ല, അത് ഞങ്ങളുടെ എ ഐ സ്‌ക്രീനർ ചെയ്യുന്നു.”
കോവിഡ്-19 മഹാമാരിയുടെ കാലത്ത്
നിരവധി കമ്പനികൾ റിക്രൂട്ട്‌മെൻ്റുമായി ബന്ധപ്പെട്ട് പ്രശ്‌നങ്ങൾ നേരിട്ടപ്പോഴാണ് മനുഷ്യനെപ്പോലെയുള്ള ഒരു എ ഐ സ്‌ക്രീനർ വികസിപ്പിക്കുക എന്ന ആശയം ആദിത്യനിൽ വന്നത്.
Sapia, Babblebot തുടങ്ങിയ ടെക് സ്റ്റാർട്ടപ്പുകൾ വീഡിയോ അഭിമുഖങ്ങൾക്കായി എ ഐ സോഫ്‌റ്റ്‌വെയർ നിർമ്മിച്ചിട്ടുണ്ടെങ്കിലും, കേവലം ഒരു അഭിമുഖം റെക്കോർഡുചെയ്യുന്നതിന് പകരം ഒരു സ്ഥാനാർത്ഥിയെ വിലയിരുത്താനുള്ള എ ഐ-യുടെ കഴിവാണ് ഹൈറിംഗിനെ വ്യത്യസ്തമാക്കുന്നതെന്ന് ആദിത്യൻ ചൂണ്ടിക്കാട്ടുന്നു.
“ഇന്ത്യയിലെയും യുഎസിലെയും 150 ഉപഭോക്താക്കൾക്ക് എ ഐ സ്‌ക്രീനർ വിൽക്കുക എന്ന ലക്ഷ്യത്തോടെ നിർമ്മാണ മേഖലയിലേക്ക് പ്രവേശിക്കുകയാണ് ഞങ്ങളുടെ അടുത്ത ലക്ഷ്യം.” ആദിത്യൻ അഭിപ്രായപ്പെട്ടു.
സോഴ്‌സിംഗ്, സ്‌ക്രീനിംഗ്, ഇൻ്റർവ്യൂ ചെയ്യൽ, ഓൺബോർഡിംഗ് എന്നിവയുൾപ്പെടെയുള്ള ഒരു പൂർണ്ണ ഓട്ടോമേറ്റഡ് ഉൽപ്പന്നം വികസിപ്പിക്കാൻ ഹൈറിംഗ് പദ്ധതിയിടുന്നതായും ആദിത്യൻ പറഞ്ഞു.
