പേർസണൽ കെയർ വിപണി അനുദിനം വികസിച്ചുകൊണ്ടിരിക്കുകയാണ്. പുരുഷന്മാരുടെ പരിചരണ ആവശ്യങ്ങളിലേക്ക് വിപണി കൂടുതലായി ഇടപെട്ട് തുടങ്ങിയിട്ട് അധികകാലമായില്ല. ബോംബെ ഷേവിംഗ് കമ്പനിയുടെ ദീർഘവീക്ഷണമുള്ള സഹസ്ഥാപകനും സിഇഒയുമായ ശന്തനു ദേശ്പാണ്ഡെ ഈ മാറ്റത്തിന്റെ മുൻനിരയിലാണ്. നൂതനമായ പരിഹാരങ്ങൾക്ക് തുടക്കമിടുകയും പുരുഷന്മാരുടെ ഗ്രൂമിങ് വ്യവസായത്തെ മാറ്റിമറിക്കുകയും ചെയ്തു അദ്ദേഹം.

ടെക്സാസിലെ ഡാളസിൽ ഒരു മഹാരാഷ്ട്ര കുടുംബത്തിൽ ജനിച്ച ശന്തനു ദേശ്പാണ്ഡെയുടെ ആദ്യകാല ജീവിതം വൈവിധ്യമാർന്ന സംസ്കാരങ്ങളെ അടുത്തറിഞ്ഞുകൊണ്ടായിരുന്നു. ഇന്ത്യയിൽ തിരിച്ചെത്തിയ ശേഷം, നാഗ്പൂരിലെ വിശ്വേശ്വരയ്യ നാഷണൽ ഇൻസ്റ്റിറ്റ്യൂട്ട് ഓഫ് ടെക്നോളജിയിൽ (വിഎൻഐടി) എഞ്ചിനീയറിംഗ് ബിരുദവും, ലഖ്‌നൗവിലെ പ്രശസ്തമായ ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്‌മെൻ്റിൽ നിന്ന് (ഐഐഎം) എംബിഎയും നേടി.

പേരുകേട്ട കൺസൾട്ടിംഗ് സ്ഥാപനമായ മക്കിൻസി ആൻഡ് കമ്പനിയിൽ ബാഹ്യ ഉപദേശകനായി ചേർന്നതോടെ ശന്തനുവിൻ്റെ പ്രൊഫഷണൽ യാത്ര ആരംഭിച്ചു. മക്കിൻസിയിലെ ജോലി അദ്ദേഹത്തിൻ്റെ നേതൃത്വപരമായ കഴിവുകളും തന്ത്രപരമായ മിടുക്കും രൂപപ്പെടുന്ന അനുഭവമായി മാറി.

പുരുഷന്മാരുടെ ഗ്രൂമിംഗ് വിപണിയിലെ ഇതുവരെ ഉപയോഗിക്കപ്പെടാത്ത സാധ്യതകളിൽ നിന്ന് പ്രചോദനം ഉൾക്കൊണ്ട്, ശന്തനു തൻ്റെ സഹസ്ഥാപകരായ ദീപു പണിക്കർ, റൗണക് മുനോട്ട്, രോഹിത് ജയ്‌സ്വാൾ എന്നിവരോടൊപ്പം 2016-ൽ ഒരു പുതിയ സംരംഭകത്വ യാത്ര ആരംഭിച്ചു. അവർ ബോംബെ ഷേവിംഗ് കമ്പനി എന്ന പേരിൽ ഒരു ഡയറക്റ്റ് ടു കസ്റ്റമർ(D2C) സംരംഭം ആരംഭിച്ചു. ഉയർന്ന നിലവാരമുള്ള പുരുഷന്മാരുടെ ഗ്രൂമിംഗ് ബ്രാൻഡ്, വ്യവസായത്തിൽ വിപ്ലവം സൃഷ്ടിക്കാൻ ലക്ഷ്യമിടുന്നു.

ബോംബെ ഷേവിംഗ് കമ്പനിയുടെ ഉൽപ്പന്ന പോർട്ട്‌ഫോളിയോയിൽ ട്രിമ്മറുകൾ, റേസറുകൾ, ഷേവ് കെയർ, സ്കിൻ കെയർ, ബാത്ത് ഉൽപ്പന്നങ്ങൾ എന്നിവയുൾപ്പെടെയുള്ള പുരുഷന്മാരുടെ ഗ്രൂമിംഗ് അവശ്യസാധനങ്ങളുടെ വിപുലമായ ശ്രേണി ഉൾക്കൊള്ളുന്നുണ്ട്. ഗ്രൂമിങ് ആവിശ്യങ്ങൾക്ക് സമഗ്രമായ പരിഹാരം തേടുന്ന പുരുഷന്മാർക്കിടയിൽ ഗുണനിലവാരത്തിലും നൂതനതയിലും മുന്നിൽ നിൽക്കുന്ന ബോംബെ ഷേവിങ്ങ് കമ്പനി ഏറെ അധികം ഉപഭോക്താക്കളെ നേടി കൊണ്ട് മുന്നേറുകയാണ്.

സ്റ്റാർട്ടപ്പിൻ്റെ ഉൽപ്പന്നങ്ങൾ Nykaa, Flipkart, Amazon എന്നിവയുൾപ്പെടെ വിവിധ ഇ-കൊമേഴ്‌സ് മാർക്കറ്റുകളിലും 40,000 സ്റ്റോറുകളിലും ലഭ്യമാണ്. ഇന്ത്യ, യുഎസ്, യൂറോപ്പ്, മിഡിൽ ഈസ്റ്റ്, ഓസ്‌ട്രേലിയ, ന്യൂസിലാൻഡ് എന്നീ രാജ്യങ്ങളിലും കമ്പനിക് സാന്നിധ്യമുണ്ട്.

2022-ൽ, ഫോർച്യൂൺ ഇന്ത്യ 40 വയസ്സിന് താഴെയുള്ള ഏറ്റവും മികച്ച 40 പേരിൽ ഒരാളായി ശാന്തനുവിനെ തിരഞ്ഞെടുത്തിരുന്നു, അദ്ദേഹത്തിൻ്റെ നേതൃത്വത്തിനും സ്വാധീനത്തിനും അടിവരയിടുന്ന അഭിമാനകരമായ അംഗീകാരം. നിലവിൽ ബോംബെ ഷേവിംഗ് കമ്പനിക്ക് ഏകദേശം 1000 കോടി രൂപ മൂല്യമുണ്ട്.