ഇന്ത്യയിൽ ഡാറ്റാ സെന്ററുകൾ സ്ഥാപിക്കുന്നതിനായി അദാനി ഗ്രൂപ്പ് പ്രമുഖ ടെക് കമ്പനികളായ മെറ്റാ, ഗൂഗിൾ, ഫ്ലിപ്കാർട്ട് എന്നിവരുമായി ചർച്ചകൾ നടത്തിവരികയാണ്. ഇതിനായി രാജ്യത്തുടനീളം അനുയോജ്യമായ സ്ഥലങ്ങൾ കമ്പനി അന്വേഷിക്കുന്നുണ്ട്. 2035-ഓടെ പുനരുപയോഗ ഊർജ്ജത്തിൽ പ്രവർത്തിക്കുന്ന നിർമ്മിത ബുദ്ധി (AI) അടിസ്ഥാനമാക്കിയുള്ള ഡാറ്റാ സെന്ററുകൾ നിർമ്മിക്കുന്നതിനായി 100 ബില്യൺ ഡോളറിന്റെ വമ്പൻ നിക്ഷേപം നടത്തുമെന്ന് കഴിഞ്ഞ മാസം അദാനി ഗ്രൂപ്പ് പ്രഖ്യാപിച്ചിരുന്നു.
പുതിയ പദ്ധതികളുടെ ചർച്ചകൾ പ്രാഥമിക ഘട്ടത്തിലാണെങ്കിലും, കഴിഞ്ഞ വർഷം ഗൂഗിളുമായി ചേർന്ന് വിശാഖപട്ടണത്ത് 15 ബില്യൺ ഡോളർ നിക്ഷേപമുള്ള വമ്പൻ ഡാറ്റാ സെന്റർ കാമ്പസ് അദാനി പ്രഖ്യാപിച്ചിരുന്നു. അമേരിക്കയ്ക്ക് പുറത്തുള്ള ഗൂഗിളിന്റെ ഏറ്റവും വലിയ ഡാറ്റാ സെന്ററായിരിക്കും ഇതെന്നാണ് പ്രതീക്ഷിക്കുന്നത്. എ.ഐയുടെ കടന്നുവരവോടെ അതിവേഗം വളരുന്ന ഇന്ത്യയിലെ ഡാറ്റാ സെന്റർ വിപണി 2032-ഓടെ 11.6 ബില്യൺ ഡോളറിലെത്തുമെന്നാണ് ഏറ്റവും പുതിയ സാമ്പത്തിക സർവേ വ്യക്തമാക്കുന്നത്.
അദാനി ഗ്രൂപ്പിന് പുറമെ മറ്റ് വൻകിട കമ്പനികളും ഈ മേഖലയിൽ വൻതോതിൽ നിക്ഷേപം നടത്തുന്നുണ്ട്. ടി.സി.എസ്സുമായി (TCS) ചേർന്ന് ഇന്ത്യയിൽ ഡാറ്റാ സെന്റർ സ്ഥാപിക്കാൻ ഓപ്പൺ എ.ഐ (OpenAI) പദ്ധതിയിടുന്നുണ്ട്. കൂടാതെ, ജാംനഗറിലും വിശാഖപട്ടണത്തുമായി എ.ഐ ഡാറ്റാ സെന്ററുകൾ നിർമ്മിക്കാൻ റിലയൻസ് 11 ബില്യൺ ഡോളറിലധികവും, 2030-നകം ക്ലൗഡ് അടിസ്ഥാനസൗകര്യങ്ങൾ വികസിപ്പിക്കാനായി ആമസോൺ 12.7 ബില്യൺ ഡോളറും ഇന്ത്യയിൽ നിക്ഷേപിക്കാൻ ഒരുങ്ങുകയാണ്.
