മുംബൈ ആസ്ഥാനമായി പ്രവർത്തിക്കുന്ന എഐ ക്ലൗഡ് പ്ലാറ്റ്‌ഫോമായ ‘നെയ്‌സ’ (Neysa), ബ്ലാക്ക്സ്റ്റോണിന്റെ നേതൃത്വത്തിൽ 1.2 ബില്യൺ ഡോളറിന്റെ (ഇക്വിറ്റിയും കടവും ഉൾപ്പെടെ) വൻ നിക്ഷേപം സമാഹരിച്ചു. ഇതോടെ 1.4 ബില്യൺ ഡോളർ മൂല്യവുമായി നെയ്‌സ ഈ വർഷത്തെ (2026) രണ്ടാമത്തെ ‘യൂണികോൺ’ (നൂറു കോടി ഡോളറിലധികം മൂല്യമുള്ള കമ്പനി) എന്ന നേട്ടം സ്വന്തമാക്കി.

സമാഹരിച്ച തുക ഉപയോഗിച്ച് ഇന്ത്യയിലുടനീളം 20,000 ജിപിയു (GPU) യൂണിറ്റുകൾ സ്ഥാപിക്കാനും എഐ അടിസ്ഥാന സൗകര്യങ്ങൾ വിപുലീകരിക്കാനുമാണ് കമ്പനി ലക്ഷ്യമിടുന്നത്. 2023-ൽ പ്രവർത്തനം ആരംഭിച്ച നെയ്‌സ, സർക്കാർ സ്ഥാപനങ്ങൾക്കും സാമ്പത്തിക, സാങ്കേതിക മേഖലകളിലെ വൻകിട കമ്പനികൾക്കും എഐ പരിശീലനത്തിനും നടത്തിപ്പിനും ആവശ്യമായ സേവനങ്ങൾ നൽകിവരുന്നു.

ശരദ് സംഘി, അനിന്യ ദാസ് എന്നിവർ ചേർന്ന് സ്ഥാപിച്ച കമ്പനി ചുരുങ്ങിയ കാലയളവിനുള്ളിലാണ് ഇത്രയും വലിയ വളർച്ച കൈവരിച്ചത്. ഇന്ത്യയുടെ എഐ മിഷനുമായി (IndiaAI Mission) ചേർന്ന് പ്രവർത്തിക്കുന്ന നെയ്‌സ, വിവരങ്ങളുടെ സുരക്ഷയ്ക്കും ചെലവ് കുറഞ്ഞ എഐ സേവനങ്ങൾക്കും വലിയ മുൻഗണനയാണ് നൽകുന്നത്.