പ്രമുഖ ഡി2സി (D2C) പുരുഷ ഫാഷൻ ബ്രാൻഡായ സ്നിച്ച് (Snitch) മുൻ സാമ്പത്തിക വർഷത്തെ അപേക്ഷിച്ച് 80 ശതമാനം വളർച്ചയോടെ 2026-ൽ 900 കോടി രൂപയുടെ വരുമാനം സ്വന്തമാക്കി. കഴിഞ്ഞ വർഷത്തെ സാമ്പത്തിക നഷ്ടത്തിൽ നിന്ന് കരകയറിയ കമ്പനി, ഇത്തവണ 18 മുതൽ 27 കോടി രൂപ വരെ ലാഭം (EBITDA) നേടിയിട്ടുണ്ട്. ഈ മികച്ച പ്രകടനത്തിന്റെ പിൻബലത്തിൽ അടുത്ത സാമ്പത്തിക വർഷം (FY27) 1,400 കോടി രൂപയുടെ വരുമാനമാണ് കമ്പനി ലക്ഷ്യമിടുന്നത്.
നിലവിൽ കമ്പനിയുടെ 60 ശതമാനം വരുമാനവും ഓൺലൈൻ വിൽപ്പനയിലൂടെയും, ബാക്കി 40 ശതമാനം രാജ്യത്തുടനീളമുള്ള 115 ഓഫ്ലൈൻ സ്റ്റോറുകളിലൂടെയുമാണ് ലഭിക്കുന്നത്. ഇന്ത്യയുടെ കിഴക്കൻ സംസ്ഥാനങ്ങളിൽ കൂടുതൽ സ്റ്റോറുകൾ തുറക്കാൻ പദ്ധതിയിടുന്നുണ്ടെങ്കിലും, നിലവിലെ സംഘർഷ സാഹചര്യങ്ങൾ കാരണം പശ്ചിമേഷ്യൻ രാജ്യങ്ങളിലെ ഓഫ്ലൈൻ വിപുലീകരണ പദ്ധതികൾ കമ്പനി താൽക്കാലികമായി നിർത്തിവച്ചിരിക്കുകയാണ്.
ഉപഭോക്താക്കൾക്ക് 60 മിനിറ്റിനുള്ളിൽ ഉൽപ്പന്നങ്ങൾ എത്തിക്കുന്നതിനായി നാല് നഗരങ്ങളിൽ ആരംഭിച്ച ‘സ്നിച്ച് ക്വിക്ക്’ (Snitch Quick) എന്ന സേവനത്തിന് മികച്ച പ്രതികരണമാണ് ലഭിക്കുന്നത്; ഇത് ഉടൻ തന്നെ കൂടുതൽ നഗരങ്ങളിലേക്ക് വ്യാപിപ്പിക്കും. ഇതിന് പുറമെ പെർഫ്യൂം, പാദരക്ഷകൾ തുടങ്ങിയ പുതിയ മേഖലകളിലേക്കും വിപണി വ്യാപിപ്പിക്കാൻ കമ്പനി തയ്യാറെടുക്കുന്നുണ്ട്. അതിവേഗത്തിലുള്ള ഈ വികസന പദ്ധതികൾക്കിടയിലും കമ്പനി ഉടൻ പുതിയ നിക്ഷേപങ്ങൾ സമാഹരിക്കാൻ ഉദ്ദേശിക്കുന്നില്ല എന്ന് സ്ഥാപകനായ സിദ്ധാർത്ഥ് ദുംഗർവാൾ വ്യക്തമാക്കി.
