സിംഗപ്പൂരിലെ ദേശീയ ജല അതോറിറ്റിയായ പി.യു.ബി-യുടെ (PUB) മലിനജല ശൃംഖലാ പരിപാലനത്തിനായുള്ള സുപ്രധാന കരാർ ഇന്ത്യൻ ഡീപ്ടെക് കമ്പനിയായ ജെൻറോബോട്ടിക്സ് (Genrobotics) സ്വന്തമാക്കി. ലോകമെമ്പാടുമുള്ള അറുന്നൂറോളം കമ്പനികളെ പിന്തള്ളിയാണ് ഈ അഭിമാനകരമായ നേട്ടം അവർ കരസ്ഥമാക്കിയത്. മനുഷ്യർക്ക് പ്രവേശിക്കാൻ അപകടകരമായ ഭൂഗർഭ ഇടങ്ങളിൽ യാന്ത്രികമായി പരിശോധനയും ശുചീകരണവും നടത്താൻ സഹായിക്കുന്ന അത്യാധുനിക റോബോട്ടുകളെയാണ് ഈ പദ്ധതിക്കായി സിംഗപ്പൂരിൽ ഉപയോഗിക്കുക.
രാജ്യത്തെ സാമൂഹിക പ്രശ്നങ്ങൾക്ക് പരിഹാരം കാണുന്നതിൽ നിന്ന് ആഗോള തലത്തിലേക്ക് സാങ്കേതികവിദ്യ കയറ്റുമതി ചെയ്യുന്ന കമ്പനിയായുള്ള ജെൻറോബോട്ടിക്സിന്റെ വളർച്ചയാണ് ഈ കരാർ വ്യക്തമാക്കുന്നത്. നിലവിൽ മലേഷ്യ, യുകെ, യുഎഇ, ദക്ഷിണാഫ്രിക്ക തുടങ്ങിയ രാജ്യങ്ങളിൽ കമ്പനിക്ക് സാന്നിധ്യമുണ്ട്. ഇന്ത്യയിൽ 23 സംസ്ഥാനങ്ങളിലായി നൂറിലധികം നഗരങ്ങളിൽ ഇവരുടെ സേവനം ഉപയോഗിക്കുന്നുണ്ട്. ഇന്ത്യൻ നിർമ്മിത റോബോട്ടുകൾ സുരക്ഷയിലും കാര്യക്ഷമതയിലും ആഗോള നിലവാരം പുലർത്തുന്നുണ്ടെന്നതിന്റെ തെളിവാണ് ഈ അംഗീകാരമെന്ന് കമ്പനി സിഇഒ വിമൽ ഗോവിന്ദ് എം.കെ പറഞ്ഞു.
മനുഷ്യർ മാൻഹോളിലിറങ്ങി മാലിന്യം കോരുന്ന തോട്ടിപ്പണി (Manual Scavenging) അവസാനിപ്പിക്കാൻ ലക്ഷ്യമിട്ട് നിർമ്മിച്ച ‘ബാൻഡിക്കൂട്ട്’ (Bandicoot) എന്ന റോബോട്ടിലൂടെയാണ് കമ്പനി ആദ്യം ശ്രദ്ധ നേടിയത്. ഇതിനുപുറമെ, ആരോഗ്യമേഖലയിൽ രോഗികളുടെ പുനരധിവാസത്തിനായി എഐ സഹായത്തോടെ പ്രവർത്തിക്കുന്ന ‘ജി-ഗെയ്റ്റർ’ (G-Gaiter) എന്ന റോബോട്ടിക് സംവിധാനവും, എണ്ണ-വാതക വ്യവസായ മേഖലയിൽ സുരക്ഷ ഉറപ്പാക്കാനുള്ള റോബോട്ടുകളും ഇവർ വികസിപ്പിച്ചിട്ടുണ്ട്. ‘മേക്ക് ഇൻ ഇന്ത്യ’ സംരംഭത്തിന്റെ ഭാഗമായി പ്രവർത്തിക്കുന്ന കമ്പനിക്ക് നിലവിൽ ഇന്ത്യയിൽ 6 പേറ്റന്റുകൾ ലഭിച്ചിട്ടുണ്ട്.
