നാസ്കോമിന്റെ (NASSCOM) പുതിയ റിപ്പോർട്ട് പ്രകാരം, 2026 സാമ്പത്തിക വർഷത്തിൽ ഇന്ത്യയുടെ ഐടി-ടെക്നോളജി മേഖലയുടെ വരുമാനം 6.1% വളർച്ചയോടെ 315 ബില്യൺ ഡോളറിൽ എത്തുമെന്ന് പ്രതീക്ഷിക്കുന്നു. ആഗോളതലത്തിൽ സാമ്പത്തിക അനിശ്ചിതത്വങ്ങൾ നിലനിൽക്കുന്നുണ്ടെങ്കിലും, ആഭ്യന്തര വിപണിയിലും കയറ്റുമതിയിലും മികച്ച മുന്നേറ്റമാണ് ഐടി മേഖല കാഴ്ചവെച്ചത്. നിക്ഷേപങ്ങൾക്ക് കൃത്യമായ ലാഭം ഉറപ്പാക്കുന്നതിലും ഉൽപ്പാദനക്ഷമത വർദ്ധിപ്പിക്കുന്നതിലുമാണ് ടെക് കമ്പനികൾ ഇപ്പോൾ പ്രധാനമായും ശ്രദ്ധ കേന്ദ്രീകരിക്കുന്നത്.
തൊഴിൽ നഷ്ടപ്പെടുമെന്ന ആശങ്കകൾക്കിടയിലും ഈ സാമ്പത്തിക വർഷം പുതിയതായി 1.35 ലക്ഷം തൊഴിലവസരങ്ങൾ സൃഷ്ടിക്കപ്പെട്ടു. ഇതോടെ ഈ മേഖലയിലെ ആകെ ജീവനക്കാരുടെ എണ്ണം 60 ലക്ഷമായി ഉയർന്നു. കൂടാതെ, 20 ലക്ഷത്തോളം ഐടി പ്രൊഫഷണലുകൾക്ക് ആർട്ടിഫിഷ്യൽ ഇന്റലിജൻസിൽ (AI) പുതിയ പരിശീലനം നൽകാനും സാധിച്ചു. വെറും പരീക്ഷണങ്ങൾക്കപ്പുറം, മനുഷ്യരും കൃത്രിമബുദ്ധിയും ഒന്നിച്ചു പ്രവർത്തിക്കുന്ന ‘ഹ്യൂമൻ + എഐ’ (Human + AI) എന്ന പുതിയ തൊഴിൽ സംസ്കാരത്തിലേക്കാണ് വ്യവസായം ഇപ്പോൾ മാറിക്കൊണ്ടിരിക്കുന്നത്.
ഈ വർഷം എഐ സാങ്കേതികവിദ്യകളിൽ നിന്ന് മാത്രം 10-12 ബില്യൺ ഡോളർ വരുമാനമാണ് നാസ്കോം പ്രതീക്ഷിക്കുന്നത്. എഞ്ചിനീയറിംഗ് റിസർച്ച് (ER&D), ബിസിനസ് പ്രോസസ് മാനേജ്മെന്റ് (BPM), ഗ്ലോബൽ കാപ്പബിലിറ്റി സെന്ററുകൾ (GCC) എന്നിവയാണ് ഈ സാമ്പത്തിക വളർച്ചയ്ക്ക് പ്രധാന കരുത്തേകുന്നത്. ആഗോളതലത്തിലുള്ള ഭൂരിഭാഗം ഉപഭോക്താക്കളും തങ്ങളുടെ ഡിജിറ്റൽ ബജറ്റിൽ എഐക്ക് കൂടുതൽ തുക വകയിരുത്താൻ തയ്യാറെടുക്കുന്നത് ഇന്ത്യൻ ടെക് വ്യവസായത്തിന് ഭാവിയിൽ കൂടുതൽ ഗുണകരമാകും.
