ഇന്ത്യൻ എഐ സ്റ്റാർട്ടപ്പായ ‘സർവം എഐ’ (Sarvam AI), തങ്ങളുടെ ആദ്യ ഹാർഡ്വെയർ ഉൽപ്പന്നമായ ‘സർവം കാസെ’ (Sarvam Kaze) എന്ന എഐ വെയറബിൾ കണ്ണട പുറത്തിറക്കി. ‘ഇന്ത്യ എഐ ഇംപാക്ട് സമ്മിറ്റി’ൽ (IndiaAI Impact Summit) വെച്ച് പ്രധാനമന്ത്രി നരേന്ദ്ര മോദിയാണ് ഈ ഉപകരണം ആദ്യമായി പരീക്ഷിച്ചത്. പൂർണ്ണമായും ഇന്ത്യയിൽ നിർമ്മിച്ച ഈ ഉപകരണം, എഐ സാങ്കേതികവിദ്യയെ സ്ക്രീനുകളിൽ നിന്ന് മാറ്റി നിത്യജീവിതത്തിന്റെ ഭാഗമാക്കാൻ ലക്ഷ്യമിടുന്നു.
ഉപയോക്താവ് കാണുന്ന കാര്യങ്ങൾ തിരിച്ചറിയാനും, കേൾക്കാനും, അതിനനുസരിച്ച് പ്രതികരിക്കാനും ശേഷിയുള്ളതാണ് ഈ ഉപകരണം. മെറ്റാ റേബാൻ (Meta Rayban), ഹ്യൂമൻ പിൻ (Humane Pin) തുടങ്ങിയ ആഗോള ഭീമൻമാരോട് മത്സരിക്കാൻ തയ്യാറെടുക്കുന്ന സർവം കാസെയിൽ, ഡെവലപ്പർമാർക്ക് പുതിയ ആപ്ലിക്കേഷനുകൾ നിർമ്മിക്കാനുള്ള അവസരവും കമ്പനി ഒരുക്കുന്നുണ്ട്.
’14 ദിവസം 14 ഉൽപ്പന്നങ്ങൾ’ എന്ന പദ്ധതിയുടെ ഭാഗമായാണ് ഈ ലോഞ്ച് നടന്നത്. അടുത്തതായി ഇന്ത്യയുടെ തനതായ വിവരങ്ങൾ ഉപയോഗിച്ച് പ്രവർത്തിക്കുന്ന ഒരു എഐ പ്ലാറ്റ്ഫോം കൂടി കമ്പനി പുറത്തിറക്കും. ലോകമെമ്പാടുമുള്ള സാങ്കേതിക വിദഗ്ധരും 500-ലധികം സ്റ്റാർട്ടപ്പുകളും പങ്കെടുക്കുന്ന എഐ സമ്മിറ്റിലാണ് ഈ സുപ്രധാന പ്രഖ്യാപനം നടന്നത്.
