ഇന്ത്യ ആക്‌സിലറേറ്ററിൻ്റെ നേതൃത്വത്തിലുള്ള ഫണ്ടിംഗ് റൗണ്ടിൽ ഡ്രോൺ ടെക്‌നോളജി സ്റ്റാർട്ടപ്പായ ഐജി ഡ്രോൺസ്, മറ്റ് എയ്ഞ്ചൽ നിക്ഷേപകരുടെ പങ്കാളിത്തത്തോടെ ഒരു മില്യൺ ഡോളർ സമാഹരിച്ചു.
ഫണ്ട് ഉപയോഗിച്ച് പ്രതിരോധ ആവശ്യങ്ങൾക്ക്‌ വേണ്ടി ഡ്രോൺ സൊല്യൂഷൻസ് സൃഷ്ടിക്കുന്നതിന് ശ്രദ്ധ കേന്ദ്രീകരിച്ച് ഗവേഷണത്തിനും വികസനത്തിനും ശ്രദ്ധ നൽകുമെന്ന് കമ്പനി പറഞ്ഞു. ഇലക്‌ട്രോണിക്‌സ് ആൻഡ് ഇൻഫർമേഷൻ ടെക്‌നോളജി മന്ത്രാലയത്തിൻ്റെ പിന്തുണയോടെയാണ് സ്റ്റാർട്ടപ്പ് പ്രവർത്തിക്കുന്നത്.
ഇന്ത്യയിലും ആഗോളതലത്തിലും തങ്ങളുടെ പ്രവർത്തനങ്ങൾ കൂടുതൽ വിപുലീകരിക്കുന്നതിനായി അടുത്ത ആറ് മാസത്തിനുള്ളിൽ 3 മില്യൺ ഡോളർ കൂടി സമാഹരിക്കാനാണ് ഐജി ഡ്രോൺസ് പദ്ധതിയിടുന്നത്.
“ഡ്രോൺ നവീകരണത്തിലും ഗവേഷണ-വികസനത്തിലും, ആഗോള തലത്തിൽ വിപുലീകരിക്കുന്നതിലുമായിരിക്കും ഞങ്ങൾ കൂടുതൽ ശ്രദ്ധ ചെലുത്തുന്നത്. ഡ്രോൺ ടെക്കിലെയും AI യിലെയും ലീഡേഴ്‌സ് എന്ന നിലയിലുള്ള ഞങ്ങളുടെ സ്ഥാനം ഉറപ്പിച്ചുകൊണ്ട് ഈ വർഷം തന്നെ ഞങ്ങൾ ക്രമാതീതമായ വളർച്ചയ്ക്ക് ഒരുങ്ങുകയാണ്. ഈ ആദ്യ റൗണ്ട് ഫണ്ടിംഗ്, ബ്രാൻഡിൻ്റെ പുരോഗമനത്തിന് ആവശ്യമായ ഉത്തേജനം നൽകും.” ഐജി ഡ്രോണുകളുടെ സ്ഥാപകനും സിഇഒയുമായ ബോധിസത്വ സംഘപ്രിയ പറഞ്ഞു.
സംഘപ്രിയയും ഓം പ്രകാശും ചേർന്ന് സ്ഥാപിച്ച ഐജി ഡ്രോണുകൾ സർവേയിംഗ്, മാപ്പിംഗ്, ഇൻസ്പെക്ഷൻ തുടങ്ങിയ സേവനങ്ങൾ വാഗ്ദാനം ചെയ്യുന്നു. കമ്പനി ഇന്ത്യൻ സൈന്യവുമായും ഒന്നിലധികം സംസ്ഥാന സർക്കാരുകളുമായും 100-ലധികം വൻകിട സംരംഭങ്ങളുമായും സഹകരിച്ചിട്ടുണ്ട്.
