ഹോം റന്റൽ പ്ലാറ്റ്ഫോമായ നെസ്റ്റ്അവേയുടെ സഹസ്ഥാപകനായ അമരേന്ദ്ര സാഹു, കമ്പനിയുടെ നിക്ഷേപകരായ ടൈഗർ ഗ്ലോബൽ, ഗോൾഡ്മാൻ സാച്ച്‌സ്, ചിറടായ വെഞ്ചേഴ്‌സ്, സഹസ്ഥാപകരായ ജിതേന്ദ്ര ജഗദേവ്, സ്മൃതി പാരിദ എന്നിവർക്കെതിരെ എഫ്ഐആർ ഫയൽ ചെയ്തു.
2020-ൽ നെസ്റ്റ്അവേ ₹1800 കോടിയുടെ മൂല്യം കൈവരിക്കുകയും ₹700 കോടി രൂപ ഫണ്ടിംഗ് നേടുകയും ചെയ്തിരുന്നു. എന്നാൽ, ഈ കമ്പനി വെറും ₹90 കോടി രൂപയ്ക്ക് വിറ്റുപോകേണ്ടിവന്നു. ഈ കേസ് ഇന്ത്യൻ സ്റ്റാർട്ടപ്പ് മേഖലയുടെ സാമ്പത്തികവും നിയമപരവുമായ പ്രശ്നങ്ങൾ വെളിവാക്കുകയാണ്. ഇതിന് പിന്നിലെ കോർപ്പറേറ്റ് മാനേജ്മെന്റും നിക്ഷേപകരുടെ പ്രവർത്തനങ്ങളും വലിയ ചോദ്യങ്ങൾ ഉയർത്തുന്നു.
കോവിഡ്-19 മഹാമാരി വ്യാപിച്ച സമയത്ത് കമ്പനി കടുത്ത അനിശ്ചിതത്വം നേരിട്ടിരുന്നു. അമരേന്ദ്ര സാഹു ഒഴികെയുള്ള എല്ലാ സഹസ്ഥാപകരും കമ്പനിയിൽ നിന്ന് പിന്മാറി. എന്നിരുന്നാലും, വെല്ലുവിളികൾക്കിടയിലും, നോൺ-കോർ ആസ്തികൾ വിറ്റ്, കുറഞ്ഞത് രണ്ട് വർഷമെങ്കിലും പ്രവർത്തനം നിലനിർത്താൻ ആവശ്യമായ പണം സമ്പാദിച്ചുകൊണ്ട് നെസ്‌റ്റവേയ്ക്ക് പിടിച്ചുനിൽക്കാൻ കഴിഞ്ഞു.
ഗൃഹാസിൽ നിന്ന് (സീരോദയുടെ നിഖിൽ കാമത്തിൻ്റെ നിക്ഷേപ വിഭാഗം) 50 കോടി രൂപയുടെ നിക്ഷേപ നിർദ്ദേശം ലഭിച്ചതിന് ശേഷവും കമ്പനിയുടെ മുൻനിര നിക്ഷേപകനായ ടൈഗർ ഗ്ലോബൽ വിൽപനയ്ക്ക് പ്രേരിപ്പിച്ചതായി സീ ബിസിനസിന്റെ റിപ്പോർട്ട് പറയുന്നു.
മൂല്യക്കുറവ് സംബന്ധിച്ച് ന്യൂനപക്ഷ ഷെയർഹോൾഡർമാർ സംശയങ്ങൾ ഉയർത്തുകയും നിക്ഷേപകരുടെ നീക്കത്തെ ചോദ്യം ചെയ്യുകയും ചെയ്തു. ബോർഡ് മെംബർ ജിതേന്ദ്ര ജഗദേവ, കമ്പനിയുടെ വിവരങ്ങൾ ഉപയോഗപ്പെടുത്തി വാങ്ങാനുള്ള ഡീൽ നടത്തുകയായിരുന്നുവെന്ന് ആരോപണം ഉയർന്നു.
അമരേന്ദ്ര സാഹു രാജി വച്ചതിനു ശേഷവും, നിക്ഷേപകർ അദ്ദേഹത്തിന്റെ കൃത്രിമ ഒപ്പിട്ട് ഷെയറുകൾ ട്രാൻസ്ഫർ ചെയ്തുവെന്ന് ആരോപിക്കുന്നു. ഷെയർ പർച്ചേസ് അഗ്രിമെന്റിന്റെ (SPA) വ്യവസ്ഥകൾ ലംഘിച്ചുകൊണ്ടാണ് ഇത് നടന്നതെന്ന് പറയുന്നു.
ഈ കേസ് ജനുവരി 9-ന് ഒഡീഷ ഹൈക്കോടതിയിൽ പരിഗണിക്കും.
