ഓപ്പൺഎഐയും മെറ്റ പ്ലാറ്റ്‌ഫോമുകളും ഇന്ത്യയിൽ തങ്ങളുടെ ആർട്ടിഫിഷ്യൽ ഇൻ്റലിജൻസ് സെർവീസുകൾ വ്യാപിപ്പിക്കുന്നതിനായി റിലയൻസ് ഇൻഡസ്ട്രീസുമായി ചർച്ചകൾ നടത്തിയതായി റിപ്പോർട്ടുകൾ പുറത്തു വന്നു.

ഗുജറാത്തിലെ ജാംനഗറിൽ റിലയൻസ് നിർമ്മിക്കാൻ പദ്ധതിയിടുന്ന ലോകത്തിലെ ഏറ്റവും വലിയ ഡാറ്റാ സെന്ററിൽ മെറ്റയുടെയും ഓപ്പൺഎഐയുടെയും മോഡലുകൾ പ്രവർത്തിപ്പിക്കാനും ചർച്ചകൾ നടക്കുന്നുണ്ട്.

റിലയൻസ് ജിയോയും ഓപ്പൺഎഐയും തമ്മിലുള്ള ബന്ധത്തിലൂടെ ചാറ്റ്ജിപിടി (ChatGPT) വിതരണം ചെയ്യുന്നതിനെക്കുറിച്ചും ചർച്ചകൾ നടന്നിട്ടുണ്ട്. ഓപ്പൺഎഐ ചാറ്റ്ജിപിടി സബ്‌സ്‌ക്രിപ്ഷൻ വില 20 ഡോളറിൽ നിന്നും കുറച്ച് ഡോളറുകളിലേക്ക് താഴ്ത്താൻ ആലോചിക്കുന്നുണ്ട് എന്നും റിപ്പോർട്ടുകൾ പറയുന്നു.

റിലയൻസ് അവരുടെ ഉപഭോക്താക്കൾക്ക് ആപ്ലിക്കേഷൻ പ്രോഗ്രാമിംഗ് ഇൻ്റർഫേസ് (API) വഴി ഓപ്പൺഎഐയുടെ മോഡലുകൾ വിൽക്കുന്നതിനെക്കുറിച്ചും ചർച്ചകൾ നടത്തിയിട്ടുണ്ട്. ലോക്കൽ യൂസേഴ്സിന്റെ ഡാറ്റ ഇന്ത്യയിൽ തന്നെ സൂക്ഷിക്കാനും ഓപ്പൺഎഐ മോഡലുകൾ ലോക്കലായി ഹോസ്റ്റ് ചെയ്യാനും റൺ ചെയ്യാനും റിലയൻസ് ആലോചിക്കുന്നുണ്ട്.

ഈ റിപ്പോർട്ടിൽ പ്രതികരിക്കാൻ മെറ്റ വിസമ്മതിച്ചു.

പെട്രോകെമിക്കൽസ്, റിഫൈനിംഗ്, ടെലികമ്മ്യൂണിക്കേഷൻസ്, റീട്ടെയിൽ, ഗ്രീൻ എനർജി എന്നിവയിൽ ഏർപ്പെട്ടിരിക്കുന്ന ഇന്ത്യയിലെ ഏറ്റവും വലിയ കമ്പനികളിൽ ഒന്നാണ് റിലയൻസ് ഇൻഡസ്ട്രീസ്.