28 വയസ്സിൽ 106 കൊടിയുമായി വിശ്രമിക്കുക. കേൾക്കുമ്പോൾ സ്വപ്നമെന്ന് തോന്നാം. പക്ഷെ ഇത് നേടിയെടുത്തിരിക്കുകയാണ് നഥാനിയേൽ ഫാരെല്ലി എന്ന അമേരിക്കക്കാരൻ. 21 വയസ്സുള്ളപ്പോൾ ആണ് നഥാനിയേൽ ഫാരെല്ലി നഴ്‌സായി ജോലിയിൽ പ്രേവേശിക്കുന്നത്. 24 വയസ്സുള്ളപ്പോൾ, ഫ്ലോറിഡയിൽ ഒരു കമ്പനി ആരംഭിച്ചു. ആളുകൾക്ക് ഐവി, ആൻറിബയോട്ടിക്കുകൾ തുടങ്ങിയ മെഡിക്കൽ ചികിത്സകൾ വീടുകളിൽ നൽകുന്ന കമ്പനിയായിരുന്നു അത്. നാല് വർഷത്തിന് ശേഷം അദ്ദേഹം കമ്പനി 12.5 മില്യൺ ഡോളറിന് (ഏകദേശം 106 കോടി രൂപ) വിറ്റു.

ഇപ്പോൾ 29 വയസ്സുള്ള നഥാനിയേൽ വിരമിച്ചു, ഏകദേശം 14 മില്യൺ ഡോളർ (ഏകദേശം 119 കോടി രൂപ) അദ്ദേഹത്തിന് വിരമിക്കൽ ഫണ്ടായിട്ടുണ്ട്. ഇപ്പോൾ ഗർഭിണിയായ ഭാര്യയും മൂന്ന് കുട്ടികളുമൊത്ത് വിശ്രമ ജീവിതം നയിക്കുന്നു. കുടുംബത്തോടൊപ്പം ചെലവഴിക്കാൻ അദ്ദേഹത്തിന് ധാരാളം സമയമുണ്ട് എന്നതാണ് പ്രധാനം.

കോവിഡ് പാൻഡെമിക് സമയത്ത്, നിരവധി ആളുകൾക്ക് ഹോം കെയർ ആവശ്യമായിരുന്ന 2020 ൽ അദ്ദേഹം റിവൈറ്റലൈസ് എന്ന പേരിലാണ് കമ്പനി ആരംഭിക്കുന്നത്. തുടക്കം മുതൽ, നിക്ഷേപകർ കമ്പനി വാങ്ങാൻ ആഗ്രഹം പ്രകടിപ്പിച്ചിരുന്നു. പക്ഷേ അത് വളരെ നേരത്തെയാണെന്ന് തോന്നിയതിനാൽ അദ്ദേഹം നിരസിക്കുകയായിരുന്നു.

പിന്നീട്, കമ്പനി വളർന്നു കൊണ്ടിരിക്കാൻ കൂടുതൽ പിന്തുണ ആവശ്യമാണെന്ന് നഥാനിയേൽ മനസ്സിലാക്കി. ഒരു വലിയ കമ്പനിക്ക് നഴ്‌സുമാരെയും രോഗികളെയും നന്നായി പരിപാലിക്കാൻ കഴിയുമെന്ന് അദ്ദേഹം മനസിലാക്കി അതോടൊപ്പം, തന്റെ കുടുംബത്തിൽ കൂടുതൽ ശ്രദ്ധ കേന്ദ്രീകരിക്കാനും അദ്ദേഹം ആഗ്രഹിച്ചു.

2023-ൽ അദ്ദേഹം റിവൈറ്റലൈസിനെ യുഎസിലെ ഏറ്റവും വലിയ ഇൻഫ്യൂഷൻ കമ്പനികളിൽ ഒന്നിന് വിറ്റു. അവിടെ അദ്ദേഹം ഏകദേശം ഒന്നര വർഷത്തോളം ജോലി ചെയ്തു, തുടർന്ന് കുടുംബത്തോടൊപ്പം സമയം ചെലവഴിക്കാൻ ഒരു ഇടവേള എടുത്തു. ഇപ്പോൾ അദ്ദേഹം വിരമിച്ചുകൊണ്ട്, നാലാമത്തെ കുട്ടിയുടെ വരവിനായി ഒരുങ്ങുകയാണ്.