ഫോൺപേ അതിന്റെ ഈ-കൊമേഴ്‌സ് സംരംഭമായ പിൻകോഡ് മുഖേന ക്വിക്ക് കൊമേഴ്‌സ് മേഖലയിലേക്ക് പ്രവേശിക്കാനൊരുങ്ങുന്നു. സമീര്‍ നിഗം നയിക്കുന്ന കമ്പനിയുടെ ഓൺലൈൻ റീറ്റെയിലിലേക്കുള്ള മൂന്നാമത്തെ ശ്രമമാണിതെന്ന് റിപ്പോർട്ടുകൾ വ്യക്തമാക്കുന്നു.

ബെംഗളൂരു, മുംബൈ, ന്യൂഡൽഹി, പുണെ, ഹൈദരാബാദ്, വരണാസി എന്നീ ആറു നഗരങ്ങളിലെ തെരഞ്ഞെടുക്കപ്പെട്ട പ്രദേശങ്ങളിൽ 15 മിനിറ്റ് ഡെലിവറി സേവനം തുടങ്ങിക്കഴിഞ്ഞു. അടുത്ത ആഴ്ചകളിൽ ഈ നഗരങ്ങളിലെ 25% പ്രദേശങ്ങളിൽ സേവനം വ്യാപിപ്പിക്കാനാണ് കമ്പനിയുടെ പദ്ധതി. 2025 ജൂണിനുള്ളിൽ പൂർണ്ണ സേവനം ആരംഭിക്കുമെന്ന് പ്രതീക്ഷിക്കുന്നു.

സോമാറ്റോ, ബ്ലിങ്കിറ്റ്, സെപ്റ്റോ, ഇൻസ്റ്റാമാർട്ട് തുടങ്ങിയവ ഈ രംഗത്ത് മുന്നിലുണ്ട്. പുതിയതായി ഫ്ലിപ്പ്കാർട്ട്, ബിഗ് ബാസ്ക്കറ്റ്, അമസോൺ എന്നിവരും അവരുടെ സാന്നിധ്യം ക്വിക്ക് കൊമേഴ്‌സ് മേഖലയിൽ ശക്തിപ്പെടുത്തുകയാണ്. ഭക്ഷ്യവസ്തുക്കൾക്ക് പുറമെ 10-15 മിനിറ്റ് ഭക്ഷ്യഡെലിവറി സേവനം വാഗ്ദാനം ചെയ്യുന്ന സ്വിഗ്ഗി, സൊമാറ്റോ, ബ്ലിങ്കിറ്റ്, സെപ്റ്റോ, ഓല, മാജിക്‌പിൻ തുടങ്ങിയവയും ഈ മേഖലയിലേക്ക് എത്തിക്കഴിഞ്ഞു.

കഴിഞ്ഞ വർഷം ഏപ്രിലിൽ, പിൻകോഡ് ആപ്പ് ONDC (Open Network for Digital Commerce) ൽ നിന്ന് ഫുഡ്‌ അല്ലാത്ത വിഭാഗങ്ങൾ ഒഴിവാക്കിയിരുന്നു. ഇപ്പോൾ ഭക്ഷ്യവിതരണവും റിസർവേഷൻ ഇല്ലാത്ത ടിക്കറ്റ് ബുക്കിങ്ങുമാണ് ONDC ൽ പിന്‍കോഡ് വാഗ്ദാനം ചെയ്യുന്നത്. റിപ്പോർട്ടുകൾ പ്രകാരം, പിൻകോഡ് ഇപ്പോൾ ക്വിക്ക് കൊമേഴ്‌സ് മോഡലിലേക്ക് മുഴുവനായി മാറിയിട്ടുണ്ട്.