പ്രമുഖ എൻബിഎഫ്സി (NBFC) സ്ഥാപനമായ ഇൻക്രെഡ് ഫിനാൻഷ്യൽ സർവീസസിന്റെ മാതൃകമ്പനിയായ ഇൻക്രെഡ് ഹോൾഡിംഗ്സ് (InCred Holdings) പ്രാരംഭ ഓഹരി വിൽപ്പനയ്ക്കായി (IPO) സെബിക്ക് (SEBI) പുതുക്കിയ രേഖകൾ സമർപ്പിച്ചു. 1,250 കോടി രൂപയുടെ പുതിയ ഓഹരികളും, ഓഫർ ഫോർ സെയിലിലൂടെ (OFS) 9.9 കോടി ഓഹരികളുമാണ് ഐപിഒ വഴി വിറ്റഴിക്കാൻ കമ്പനി ലക്ഷ്യമിടുന്നത്. കെകെആർ (KKR), എംഇഎംജി ഫാമിലി ഓഫീസ് (MEMG Family Office) തുടങ്ങിയ പ്രമുഖ നിക്ഷേപകരാണ് ഇതിലൂടെ തങ്ങളുടെ ഓഹരികൾ വിറ്റഴിക്കുന്നത്.
ഓഹരി വിൽപ്പനയിലൂടെ സമാഹരിക്കുന്ന തുക പ്രധാനമായും തങ്ങളുടെ ഉപകമ്പനിയുടെ മൂലധന അടിത്തറ വിപുലീകരിക്കാനും, നിലവിലെ വായ്പാ വിതരണ പ്രവർത്തനങ്ങൾ കൂടുതൽ ഊർജ്ജിതമാക്കാനുമാണ് കമ്പനി ഉപയോഗിക്കുക. 2011-ൽ ആരംഭിച്ച ഇൻക്രെഡ് ഗ്രൂപ്പ്, വായ്പകൾ നൽകുന്ന ഇൻക്രെഡ് ഫിനാൻസ്, നിക്ഷേപങ്ങൾ കൈകാര്യം ചെയ്യുന്ന ഇൻക്രെഡ് കാപ്പിറ്റൽ, ഇൻക്രെഡ് മണി എന്നീ മൂന്ന് വിഭാഗങ്ങളിലായാണ് പ്രവർത്തിക്കുന്നത്. 2023-ൽ 60 ദശലക്ഷം ഡോളറിന്റെ ഫണ്ടിംഗ് സ്വന്തമാക്കിയതോടെ കമ്പനി രാജ്യത്തെ യൂണികോൺ ക്ലബ്ബിലും ഇടംനേടിയിരുന്നു.
നിലവിൽ ഇന്ത്യയിലുടനീളം 152 നഗരങ്ങളിലായി 158 ശാഖകളാണ് കമ്പനിക്കുള്ളത്, കൂടാതെ ഇവരുടെ മൊബൈൽ ആപ്പിന് 4.5 ലക്ഷത്തിലധികം ഉപയോക്താക്കളുമുണ്ട്. സാമ്പത്തിക പരമായി മികച്ച പ്രകടനമാണ് കമ്പനി കാഴ്ചവെക്കുന്നത്. നടപ്പ് സാമ്പത്തിക വർഷത്തിന്റെ ആദ്യ ഒമ്പത് മാസങ്ങളിൽ ഇൻക്രെഡ് ഹോൾഡിംഗ്സിന്റെ സംയോജിത അറ്റാദായം 5.3 ശതമാനം വർദ്ധിച്ച് 290.1 കോടി രൂപയായും, പ്രവർത്തന വരുമാനം 38.6 ശതമാനം ഉയർന്ന് 1,848.9 കോടി രൂപയായും രേഖപ്പെടുത്തിയിട്ടുണ്ട്.
