ഹിന്ദുസ്ഥാൻ യൂണിലിവർ (HUL) ഏറ്റെടുത്തതിന് പിന്നാലെ പ്രമുഖ സ്കിൻകെയർ ബ്രാൻഡായ മിനിമലിസ്റ്റിന്റെ വരുമാനത്തിൽ മികച്ച നേട്ടം. 2026 മാർച്ചിൽ അവസാനിച്ച സാമ്പത്തിക വർഷത്തിൽ കമ്പനിയുടെ പ്രവർത്തന വരുമാനം 36 ശതമാനം വർധിച്ച് 690.2 കോടി രൂപയിലെത്തി. ഈ സാമ്പത്തിക വർഷം 25.9 കോടി രൂപയാണ് കമ്പനിയുടെ അറ്റാദായം (PAT) രേഖപ്പെടുത്തിയിരിക്കുന്നത്.
വരുമാനത്തോടൊപ്പം കമ്പനിയുടെ ചിലവുകളിലും വലിയ വർദ്ധനവ് ഉണ്ടായിട്ടുണ്ട്. ഈ കാലയളവിൽ മൊത്തം ചിലവ് 664.8 കോടി രൂപയായി ഉയർന്നു. ഇതിൽ ഏറ്റവും വലിയ ചിലവ് പരസ്യങ്ങൾക്കും പ്രൊമോഷനുകൾക്കുമാണ്; ഇത് 55 ശതമാനം വർധിച്ച് ഏകദേശം 235 കോടി രൂപയായി. ബാക്കി തുക വിതരണ ചിലവുകൾ, ജീവനക്കാരുടെ ആനുകൂല്യങ്ങൾ, മറ്റ് പ്രവർത്തന ചിലവുകൾ എന്നിവയ്ക്കായി കമ്പനി വിനിയോഗിച്ചു.
2020-ൽ മോഹിത് യാദവ്, രാഹുൽ യാദവ് എന്നിവർ ചേർന്ന് ആരംഭിച്ച ഈ ഡിജിറ്റൽ-ഫസ്റ്റ് ബ്രാൻഡിന്റെ 90.5 ശതമാനം ഓഹരികളും 2025 ജനുവരിയിലാണ് എച്ച്യുഎൽ സ്വന്തമാക്കിയത്. പ്രീമിയം ബ്യൂട്ടി മേഖലയിൽ തങ്ങളുടെ സാന്നിധ്യം കൂടുതൽ ശക്തമാക്കുക എന്ന ലക്ഷ്യത്തോടെയായിരുന്നു ഈ ഏറ്റെടുക്കൽ. എച്ച്യുഎൽ-ന്റെ പിന്തുണയോടെ ഗവേഷണവും വിതരണ ശൃംഖലയും ഓഫ്ലൈൻ വിപണിയും കൂടുതൽ വിപുലീകരിക്കാനാണ് മിനിമലിസ്റ്റ് ഇപ്പോൾ ലക്ഷ്യമിടുന്നത്.
