വിദേശ നിക്ഷേപകരുടെ ഓഹരി പങ്കാളിത്തം 50 ശതമാനത്തിൽ താഴെ എത്തിയതോടെ പ്രമുഖ ഫിൻടെക് സ്ഥാപനമായ പേടിഎം ഔദ്യോഗികമായി ഒരു ഇന്ത്യൻ ഉടമസ്ഥതയിലുള്ളതും നിയന്ത്രിക്കുന്നതുമായ കമ്പനിയായി (IOCC) മാറി. 2026 സാമ്പത്തിക വർഷത്തിന്റെ നാലാം പാദത്തിലെ കണക്കുകൾ പ്രകാരം, കമ്പനിയിൽ ആഭ്യന്തര നിക്ഷേപകർക്ക് 50.3% ഭൂരിപക്ഷ ഓഹരികൾ ലഭിച്ചതായി പേടിഎം ഔദ്യോഗികമായി വ്യക്തമാക്കിയിട്ടുണ്ട്.

നാലാം പാദത്തിൽ വിദേശ നിക്ഷേപകരുടെ (FII) പങ്കാളിത്തം മുൻ പാദത്തിലെ 51.76 ശതമാനത്തിൽ നിന്നും 49.4 ശതമാനമായി കുറഞ്ഞു. ഇന്ത്യൻ ഓഹരി വിപണിയിൽ നിന്നുള്ള വിദേശ നിക്ഷേപകരുടെ പൊതുവായ പിന്മാറ്റത്തിന്റെ ഭാഗമായാണ് പേടിഎമ്മിലും ഈ ഇടിവ് രേഖപ്പെടുത്തിയത്. വിവിധ വിദേശ പോർട്ട്‌ഫോളിയോ നിക്ഷേപകരും (FPI), വിദേശ നേരിട്ടുള്ള നിക്ഷേപങ്ങളും (FDI) ഈ കാലയളവിൽ തങ്ങളുടെ ഓഹരികൾ വെട്ടിക്കുറച്ചിട്ടുണ്ട്.

അതേസമയം, മ്യൂച്വൽ ഫണ്ടുകൾ, ഇൻഷുറൻസ് കമ്പനികൾ തുടങ്ങിയ ആഭ്യന്തര നിക്ഷേപ സ്ഥാപനങ്ങൾ (DII) പേടിഎമ്മിലെ തങ്ങളുടെ നിക്ഷേപം 20.32 ശതമാനത്തിൽ നിന്നും 23.08 ശതമാനമായി വർദ്ധിപ്പിച്ചു. പുതിയതായി അഞ്ച് മ്യൂച്വൽ ഫണ്ടുകൾ കൂടി നിക്ഷേപകരുടെ പട്ടികയിൽ ഇടംനേടിയതോടെ മൊത്തം ഫണ്ടുകളുടെ എണ്ണം 51 ആയി. ഈ സാമ്പത്തിക വർഷം കമ്പനി മികച്ച ലാഭം രേഖപ്പെടുത്തിയതും ഈ മാറ്റങ്ങൾക്ക് കരുത്തേകി. ഇന്ന് ബിഎസ്ഇയിൽ പേടിഎമ്മിന്റെ ഓഹരി വില 2.9% ഉയർന്ന് 1,139.4 രൂപയിലാണ് വ്യാപാരം അവസാനിപ്പിച്ചത്.