പ്രതിസന്ധികൾക്കിടയിലും കഴിഞ്ഞ സാമ്പത്തിക വർഷത്തിൽ (FY26) പ്രമുഖ ഓൺലൈൻ യാത്രാ കമ്പനിയായ മേക്ക്മൈട്രിപ്പ് (MakeMyTrip) മികച്ച സാമ്പത്തിക നേട്ടം സ്വന്തമാക്കി. കമ്പനിയുടെ മൊത്തം ബുക്കിംഗ് 10.4 ശതമാനം വർദ്ധിച്ച് 10.4 ബില്യൺ ഡോളർ എന്ന റെക്കോർഡിലെത്തി. ചരിത്രത്തിലാദ്യമായി കമ്പനിയുടെ വാർഷിക വരുമാനം ഒരു ബില്യൺ ഡോളർ പിന്നിട്ട് 1.04 ബില്യൺ ഡോളറായി ഉയർന്നു. വിമാന, ബസ് ടിക്കറ്റ് ബുക്കിംഗുകളിലും ഹോട്ടൽ പാക്കേജുകളിലും വലിയ വളർച്ച നേടാൻ ഇതിലൂടെ കമ്പനിക്ക് സാധിച്ചു.
വരുമാനത്തിൽ മികച്ച വർദ്ധനവുണ്ടായെങ്കിലും കമ്പനിയുടെ വാർഷിക ലാഭത്തിൽ വലിയ ഇടിവ് സംഭവിച്ചു. കഴിഞ്ഞ സാമ്പത്തിക വർഷത്തെ ലാഭം 45.8 ശതമാനം കുറഞ്ഞ് 51.7 മില്യൺ ഡോളറായി. ഇരട്ടിയോളമായി വർദ്ധിച്ച സാമ്പത്തിക ചെലവുകളാണ് ലാഭം കുറയാൻ പ്രധാന കാരണമായത്. സാമ്പത്തിക വർഷത്തിന്റെ അവസാന പാദത്തിലും കമ്പനിയുടെ ലാഭം 16.8 ശതമാനം കുറഞ്ഞ് 24.3 മില്യൺ ഡോളറായി ചുരുങ്ങിയിരുന്നു.
യാത്രാ ബുക്കിംഗ് കൂടുതൽ എളുപ്പമാക്കുന്നതിനായി മേക്ക്മൈട്രിപ്പ് അവതരിപ്പിച്ച ‘മൈറ’ (Myra) എന്ന ആർട്ടിഫിഷ്യൽ ഇന്റലിജൻസ് (AI) അസിസ്റ്റന്റ് ഉപഭോക്താക്കൾക്കിടയിൽ വൻ വിജയമായി മാറി. അവസാന പാദത്തിൽ പ്രതിദിനം 54,000-ത്തിലധികം ആശയവിനിമയങ്ങളാണ് മൈറ കൈകാര്യം ചെയ്തത്. ഇതിൽ 45 ശതമാനത്തിലധികവും ചെറിയ നഗരങ്ങളിൽ (Tier-2) നിന്നുള്ളവരായിരുന്നു. കൂടാതെ, ടിക്കറ്റ് ബുക്ക് ചെയ്തതിന് ശേഷമുള്ള 55 ശതമാനത്തോളം സംശയങ്ങൾക്കും ഈ എ.ഐ സംവിധാനം തനിയെ മറുപടി നൽകിയതായി കമ്പനി ഗ്രൂപ്പ് സി.ഇ.ഒ രാജേഷ് മാഗോ വ്യക്തമാക്കി.
