ലോകപ്രശസ്ത കോഫി ശൃംഖലയായ സ്റ്റാർബക്സ് ഇന്ത്യയിലെ ആദ്യത്തെ ഗ്ലോബൽ കേപ്പബിലിറ്റി സെന്റർ (GCC) ചെന്നൈയിൽ ആരംഭിക്കാൻ തീരുമാനിച്ചു. ഇതിനായി കമ്പനി തമിഴ്നാട് സർക്കാരുമായി ധാരണാപത്രത്തിൽ ഒപ്പുവെച്ചിട്ടുണ്ട്. ഈ പുതിയ കേന്ദ്രത്തിലൂടെ 800-ഓളം പുതിയ തൊഴിലവസരങ്ങൾ സൃഷ്ടിക്കപ്പെടും.
തമിഴ്നാട്ടിലെ വിദഗ്ദ്ധരായ തൊഴിലാളികളുടെ ലഭ്യതയും കുറഞ്ഞ തൊഴിൽ നഷ്ട നിരക്കുമാണ് ചെന്നൈ തിരഞ്ഞെടുക്കാൻ കമ്പനിയെ പ്രേരിപ്പിച്ചത്. ടാറ്റ കൺസ്യൂമർ പ്രോഡക്ട്സുമായി ചേർന്നുളള റീട്ടെയിൽ ബിസിനസ് സംരംഭത്തിൽ നിന്ന് പൂർണ്ണമായും സ്വതന്ത്രമായാണ് ഈ പുതിയ ആഗോള സാങ്കേതിക കേന്ദ്രം പ്രവർത്തിക്കുക.
ഇന്ത്യ നിലവിൽ ആഗോളതലത്തിൽ ഇത്തരം കേന്ദ്രങ്ങളുടെ പ്രധാന കേന്ദ്രമായി വളർന്നുകൊണ്ടിരിക്കുകയാണ്. രാജ്യത്തിന്റെ സാങ്കേതിക രംഗത്തിന് കരുത്ത് പകർന്നു കൊണ്ട് നിരവധി വിദേശ കമ്പനികളാണ് ഇപ്പോൾ ഇന്ത്യയിൽ തങ്ങളുടെ ആഗോള കാര്യാലയങ്ങൾ തുറക്കുന്നത്.
