ടാറ്റാ കൺസൾട്ടൻസി സർവീസസിന്റെ (TCS) ഉപകമ്പനിയായ ഹൈപ്പർവാൾട്ടും (HyperVault) പങ്കാളികളും ചേർന്ന് ഹൈദരാബാദിൽ 1 ജിഗാവാട്ട് (1 GW) ശേഷിയുള്ള വമ്പൻ ആർട്ടിഫിഷ്യൽ ഇന്റലിജൻസ് (AI) ഡാറ്റാ സെന്റർ നിർമ്മിക്കാൻ 70,000 കോടി രൂപ നിക്ഷേപിക്കുന്നു. ഇതിനായി 264 ഏക്കർ ഭൂമി സ്വന്തമാക്കിയ ടിസിഎസ്, പരിസ്ഥിതി സൗഹൃദമായ രീതിയിലാണ് ഇന്ത്യയിലെ തന്നെ ഏറ്റവും വലിയ ഈ എഐ ഇൻഫ്രാസ്ട്രക്ചർ ക്യാമ്പസ് ഒരുക്കുന്നത്. പദ്ധതി പൂർത്തിയാകുന്നതോടെ ഈ പ്രദേശത്ത് ആയിരക്കണക്കിന് പ്രത്യക്ഷ-പരോക്ഷ തൊഴിലവസരങ്ങൾ സൃഷ്ടിക്കപ്പെടും.
എഐ ഡാറ്റാ സെന്ററുകൾ നിർമ്മിക്കുക എന്ന ലക്ഷ്യത്തോടെ കഴിഞ്ഞ വർഷമാണ് ടിസിഎസ് ഹൈപ്പർവാൾട്ടിന് രൂപം നൽകിയത്. ഈ ഉപകമ്പനിയുടെ വികസനത്തിനായി ആഗോള നിക്ഷേപകരായ ടിപിജിയുമായി (TPG) ടിസിഎസ് പങ്കാളിത്തം ഉറപ്പാക്കുകയും 18,000 കോടി രൂപയുടെ പ്രാരംഭ നിക്ഷേപം പ്രഖ്യാപിക്കുകയും ചെയ്തിരുന്നു. ഇതിനുപുറമെ, പ്രമുഖ എഐ കമ്പനിയായ ഓപ്പൺഎഐയുടെ (OpenAI) ഇന്ത്യയിലെ ഇൻഫ്രാസ്ട്രക്ചർ ഒരുക്കുന്നതിനായി അവരുമായും ഹൈപ്പർവാൾട്ട് സഹകരിക്കുന്നുണ്ട്.
ഇന്ത്യയിലെ വൻകിട കമ്പനികൾ തദ്ദേശീയമായി എഐ ഇൻഫ്രാസ്ട്രക്ചർ വികസിപ്പിക്കുന്ന രംഗത്തേക്ക് ചുവടുവെക്കുന്നതിന്റെ വ്യക്തമായ സൂചന കൂടിയാണ് ടിസിഎസിന്റെ ഈ പുതിയ നീക്കം. എച്ച്സിഎൽ ടെക് (HCLTech), എൽ ആൻഡ് ടി (L&T), അദാനി ഗ്രൂപ്പ് എന്നിവർ ഇതിനകം തന്നെ സ്വന്തമായി എഐ ഡാറ്റാ സെന്ററുകൾ നിർമ്മിക്കാൻ പങ്കാളിത്തങ്ങൾ പ്രഖ്യാപിച്ചിട്ടുണ്ട്. കൂടാതെ, വരും വർഷങ്ങളിൽ എഐ മേഖലയിൽ 10 ലക്ഷം കോടി രൂപ നിക്ഷേപിക്കാനും ഗുജറാത്തിൽ എഐ ഡാറ്റാ സെന്റർ സ്ഥാപിക്കാനും റിലയൻസും പദ്ധതിയിടുന്നുണ്ട്.
